من هو الملحد؟
الملحد هو من لا دين له، ولا يؤمن بأن هناك خالق للكون والبشر، ويعتقد بأن الحياه عبارة عن صدفه. هذا مجرد تعريف بسيط للملحد ولكن بإختصار هو يعتقد عكس ما نعتقدة.

على كثر طلعاتي مع كمبوش إلا اني عمري ما شفته يصلي أو حتى يذكر الله، بصراحه ما كنت اركّز كثير على هالشي لأن كثير من ربعي ما يصلوا وسؤالي لهم عن السبب يحرجهم، فصرت اتحاشا اسأل، لكن بما ان كمبوش صديقي وقريب مني كثير .. قررت ف يوم اسأله:

أنا: كمبوش على كثر طلعتنا مع بعض الا اني ما شفتك ف يوم تصلي!
كمبوش: ههههههههه والله ضحكتني عماد.
أنا: كمبوش اتكلم جد انت ليش ما تصلي؟
كمبوش: عماد انا ما أؤمن بالله فكيف تريدني اصلي!؟
أنا: أستغفر الله أستغفر الله… ايش هذا الكلام كمبوش!
كمبوش: انت مقتنع باللي جالس تسويه.
أنا: ايش تقصد!؟
كمبوش: إنت تؤمن ان في خالق لهذا الكون وانك تصلي له!
أنا: طبعاً هذا ما فيه شك.
كمبوش: تعرف انت ليش تؤمن؟
أنا: ليش؟
كمبوش: لأن هذا انزرع فيك من صغرك من اهلك في البيت إلى المدرسة ومادة التربية الإسلامية، صار عندك نوع من القناعة إللي تخليك ما تشوف الأشياء الثانيه.
أنا: ترى هذا هو الصح.
كمبوش: وليش هذا هو الصح؟
أنا: لأنك لو تدبرت معاني القرآن وعرفت اللي مكتوب فيه بتشوف ان ديننا هو الصح.
كمبوش: إذا كان ديننا هو الصح ليش المسلمين هم النسبه الأقل في العالم وفي ديانات غير الاسلام .. المسيحية واليهودية؟
أنا: هذه النسبه ما اعرف عنها، لكن اللي اعرفه ان في ناس من ديانات غير دخلوا الاسلام، معنى هذا ان الاسلام صح.
كمبوش: طيب خلني اسألك كم سؤال وما اريدك تجاوبني الحين بس اريدك تفكر فيهم.
أنا: تفضل.
كمبوش: من خلق الله؟
أنا: الله ما مخلوق.
كمبوش: كيف ما مخلوق؟
أنا: كيف اللي خلق الخلق يكون مخلوق؟؟ ما يصير.. لأن ما كل شي نصنعه يكون بنفس صفاتنا!
كمبوش: انت فكر في الاجابه ورد علي بشئ مقنع.
أنا: تمام.. في سؤال ثاني؟
كمبوش: ايوه.. الرسول تزوج عائشه وهي في سن 9 سنوات.
أنا: هذه القصه انا ما اعرف عنها شي.
كمبوش: هذه المشكله عماد.. انك ما قرأت شي عن دينك.
أنا: كمبوش انا اعترف اني ما قرأت لكن اذا قررت أقرأ لازم اختار ايش اقرأ.
كمبوش: المهم انا بخليك الحين .. ونلتقي في وقت ثاني.
أنا: تمام.. عسى الله يهديك.
كمبوش: ههههههههه ما اعتقد بيهديني. لأنه ما يعرفني.
أنا: أستغر الله.

راح كمبوش في حال سبيله، وخلاني في وضع اول مره اكون فيه، انا ما بينت لكمبوش اني متأثر بكلامه علشان ما يقول عني ضعيف الايمان، لكن بصراحه خلاني افكر واحاول ادور على اجابة، كمبوش ما قال عن نفسه ملحد ولا انا جا في بالي انه ملحد، لحد ما دخلت الانترنت ادور على اجابات لأسئلته، وحصلت ان اسئلته يسألوها الملحدين، في هذا الوقت بس أدركت ان كمبوش ملحد.

الإنترنت فيه الشين والزين، والذكي اللي يعرف يميز بين الاثنين، المهم انا تصفحت الانترنت وحصلت اجوبه لأسئلته، لأني اكتشفت ان اسئلته انسألت قبل كثير وجاوب عليها كثار، وإلتقينا بعدها ودار النقاش حول نفس الموضوع.

كمبوش: هاه حصلت الاجوبه؟
أنا: هيه حصلتهم.. ابتديبك بمن خلق الله.
كمبوش: بشّرني عسى عرفته.
أنا: لو بدأت تقول من خلق الله وإعتبرت الله (أ) فمن خلق (أ) ؟ خلقة (ب)..  ومن خلق (ب) ؟  خلقة (ج)…الخ. يعني بتبدي شي ما ينتهي.
كمبوش: اها.. وبعدين؟
أنا: لأنك انته بشر ومحدود بحواس خمس وكل شي حولك تقدر تدركه بسهوله مثل لما تشوف سيارتك الصباح انتقلت من موقف إلى موقف ثاني شئ طبيعي بتسأل من اللي نقلها لأن السياره جماد وما بتنتقل وحدها، لكن ما بتسأل من اللي نقلني انا من صالة بيتكم مثلاً إلى المجلس لأن انا عندي عقل و أرجل واقدر اتحرك بنفسي.
كمبوش: ما فهمت!
أنا: لانك تعرف ان السياره مستحيل تتحرك وحدها فبتسأل من نقلها، ولأنك تعرف اني انا اقدر انتقل بنفسي فما سألت من نقلني.
كمبوش: والخلاصة؟
أنا: الخلاصه ان سؤالك عن من خلق الله غلط اصلاً لان هذا اكبر مني ومنك، هذا شي ما موجود في الدنيا علشان تتخيله ولو كان موجود ما كان الله موجود.
كمبوش: همممممم وجهة نظر احترمها.
أنا: وجود الله شئ مفروغ منه، لا تقولي ان هذا الكون مافي احد يديره هذا الشي مستحيل، بعيد عن الديانات والإسلام انا اقولك هذا الكون لاااااازم في احد يسيّره، وانا اقول هذا لأني بشر وتحكمني حواس خمس اذا كانت السياره مستحيل تمشي بدون ما احد يمشيها حتى لو بجهاز لاسلكي فمستحيل كون بأسره يمشي بدون مسيّر له.
كمبوش: طيب خلنا من هالموضوع، وجاوبني عن سؤال زواج الرسول.
أنا: الرسول (صلى الله عليه وسلم) تزوج عائشة رضي الله عنها وهي عمرها 14 سنه ودخل عليها وهي عمرها 18 سنه.
كمبوش: وكيف عرفت؟
أنا: في واحد عامل حسابات بالسنوات الميلاديه حسب ما مذكور في كتب التاريخ انصحك تقرأه هنا
كمبوش: لو اني ما اصدق كل اللي يقال بس خلني اعطيك كم سؤال غير.
أنا: تفضل.
كمبوش: الله كان ناوي يخلي البشر يعبدوه بـ خمسين صلاة في اليوم، بعدين الرسول سوا واسطه وخلاهن خمس.
أنا: بدون تعليق على طريقة الطرح بس كمّل.
كمبوش: تصوّر انك تصلى 50 صلاة في اليوم.. كيف كنت بتعيش حياتك؟ متى بتاكل متى بتشرب متى بتشتغل ومتى بتنام؟
أنا: سمعت عن هذا الشئ، بس هذا ما معناه ان لو كانت خمسين صلاة كانت بتكون بنفس الصلوات الخمس اللي الحين نصليها، يمكن تكون مجموعة بركعات معدوده او بأسلوب آخر أسهل.
كمبوش: وايش هذا الاسلوب السهل.
أنا: الله يعلم.
كمبوش: عماد بسألك اذا كان الله فوق وقادر على كل شي مثل ما يقول.. ليش فيه فقراء وفيه مرضى وبأس وجوع؟
أنا: كمبوش لو ما موجود الشر ما كنت عرفت الخير ولو وماشي فقر ما كنت عرفت الغنى، واللي لازم تعرفه ان لو كان كل الناس نفس الشي ما كان في جنه ونار وجزاء وعقاب.
كمبوش: يعني بعيش حياتي البائس الفقير علشان ادخل الجنه!
أنا: ومن قال لازم تعيش عيشة البائس الفقير! ياخي في مطاوعه عايشين احسن عيشه وفي سكّارين خمّارين عايشين فقرا. الفقر والغنى ماله علاقه بالإسلام.
كمبوش: وليش؟ ليش ما الله يعطيكم فلوس انتو المسلمين وتعيشوا حياه سعيده في الدنيا وبكذا الكل بيدخل الإسلام.
أنا: كمبوش اسلوبك فيه نوع من الإستهزاء… لكن بعدني اجاوبك… ياخي الاسلام غير والدنيا غير.. احنا نعيش حياتنا عادي بحدود رسمها لنا الإسلام، الإسلام ما قال لا تتاجر او قال عيش فقير.. الإسلام يقول عيش حياتك بالإسلام يعني اعرف حدودك.
كمبوش: انا ما بقدر ازيد معك بالكلام لأنك ما راضي تفتح عقلك، انت عقلك مقفول بقفل اسمه الاسلام وما يخليك تفتحه علشان تستخدمه صح.
أنا: بعيد عن الإسلام والدين انا ما اقتنع ان مافي أحد يدير هذا الكون كله.
كمبوش: على طاري الكون … انته شفت الكون عباره عن ايش؟
أنا: وصلني ايميل فيه صور عن المجموعة الشمسية والمجموعات الثانية.
كمبوش: شفت كيف الأرض صغيرة؟
أنا: ايوه .. كثييييييييييير صغيرة مقارنه بالكواكب الثانية.
كمبوش: انت الحين أقنعني ان ربّك خلق كل هذا الكون وخلاه فاضي وجاي على الأرض الصغيرة يتحكم في البشر ويقوللهم اعبدوني. يعني الكون كله مافي غيرنا!.. كيف يصير كذا.
أنا: يمكن في غيرنا وإحنا ما ندري.
كمبوش: إذا في غيرنا وان الله عالم بكل شئ.. ليش ما مذكور شي في القرآن.
أنا: همممممممممم، أنا اذا جاوبتك فجوابي بيكون في حدود عقلي وما بقدر اتعمق في الاجابة.
كمبوش: طيب جاوب.
أنا: ما أعتقد ان في احد غيرنا عايش في الكون، وباقي الكون انخلق علشان نشوف عظمة الخالق، وفي اسباب ثانية قد نكون ما نعرفها ويمكن ما بنقدر نعرفها إلى 100 سنه قدّام.. مثل تكوني الإنسان من الداخل … مافي قطعة في الإنسان ما لها لزوم.. كل شي له عمل معيّن .. لكن الأطباء في البداية ما اكتشفوا عمل كل جزء الا بعد ابحاث معمّقه، الإنسان جزء بسيط وممكن من عملية تشريح وحده يعرف الدكتور الجديد في مهنته تفاصيل الجسم من الداخل، بس الكون شئ كبير وصعب نوصل لكل شئ فيه إلا بعد مصاريف خيالية وأبحاث تكلّف الملايين.
كمبوش: الخلاصة؟
أنا: محد عايش غيرنا في الدنيا بس لكل شئ مخلوق سبب لخلقة.
كمبوش: وجهة نظر.
أنا: كمبوش ما أريد اطوّل معاك بالكلام لأني أعرف انك ما بتقتنع بكلامي، ويمكن يصير زعل بيننا، بس علشان كذا خلينا أصدقاء وبدون ما نطري هالسوالف.
كمبوش: ولا أنا اريد اخوض في هالسوالف لأني مقتنع باللي أسويه.

ظل كمبوش صديقي ونطلع مع بعض لفترة طويلة، لكن محّد تأثر بالثاني، كل واحد حافظ على معتقداته وأفكارة، بين فترة وفترة نتناقش عن هذا الموضوع، وطبعاً ما نوصل لنهاية للموضوع لأن كل واحد متمسّك برأية.

في بداية معرفتي بإلحاد كمبوش حسيت ان السالفة هي مجرّد تحرر من القيود، يعني كأنه عذر علشان ما يصلي أو يصوم أو يكون عنده حواجز يفرضها عليه الدين، لكن مع الأيام أكتشفت ان كمبوش انزرع فيه هالشي خلاص لأنه يقرأ بشكل كبير عن الإلحاد وإثبات نظرية ان الديانات مجرد قانون يرتّب حياة الناس وانه شئ خطأ، حتى أذكر في يوم اعطيته كتاب عن الإعجاز في الكون وخلال يوم او يومين قرأ منه 200 صفحه، وبعدها رسل لي رساله على تلفوني يقول ان كله كلام فاضي!

طبعاً مثل ما شفتوا كمبوش في هذه القصه .. راسه يابس ومستحيل يسمعني، هذا شئ عادي، لأن شخص مثلي ما قرأ عن دينه كثير ولا عنده إلمام بالتاريخ كيف يرد على واحد قرأ كثير عن هذه الأشياء! فإللي المفروض يرد على كمبوش واحد في نفس مستواه، واحد فاهم وعنده جواب لكل سؤال.

جميع الحقوق محفوظة لدى eOman.me